Kompania kosovare Lindja Solar LLC ka nënshkruar një marrëveshje me kompaninë turke YEO Technology për ndërtimin e një parku fotovoltaik me kapacitet prej 130 megavatësh (MWp) në Kosovë, një investim që pritet të jetë ndër projektet më të mëdha të energjisë diellore në vend.
Sipas marrëveshjes, YEO Technology do të realizojë projektin sipas modelit EPC (Engineering, Procurement and Construction), duke marrë përsipër projektimin inxhinierik, furnizimin me pajisje dhe materiale, ndërtimin, instalimin, testimin dhe vënien në funksion të centralit fotovoltaik.
Vlera financiare e kontratës nuk është bërë publike, ndërsa kompania turke nuk ka dhënë detaje shtesë lidhur me investimin.
Sipas regjistrit të bizneseve në Kosovë, kompania Lindja Solar ka një strukturë aksionare ndërkombëtare. Nga 30% të aksioneve zotërohen nga kompanitë zvicerane Orllati dhe Holdigaz, ndërsa 40% e mbetur ndahet në mënyrë të barabartë ndërmjet kompanisë gjermane të energjisë së rinovueshme ZPV GmbH & Co. dhe kompanisë kosovare Jaha Solar, prodhuesi i parë i paneleve diellore në Ballkanin Perëndimor.
Ky projekt konsiderohet një hap i rëndësishëm në tranzicionin energjetik të Kosovës, e cila vazhdon të mbështetet kryesisht në prodhimin e energjisë nga termocentralet me linjit. Rritja e kapaciteteve të energjisë së ripërtëritshme pritet të kontribuojë në diversifikimin e burimeve energjetike, uljen e emetimeve të karbonit dhe forcimin e sigurisë së furnizimit me energji elektrike.
Sipas planifikimeve të kompanive të përfshira, centrali fotovoltaik me kapacitet 130 MW pritet të jetë një nga projektet më të mëdha të këtij lloji në Kosovë dhe të hyjë në funksion gjatë vitit 2027, duke dhënë një kontribut të rëndësishëm në zhvillimin e sektorit të energjisë së gjelbër dhe në arritjen e objektivave të vendit për një ekonomi më të qëndrueshme.
