Visa ka prezantuar funksionalitete të reja në kuadër të platformave Visa Accept dhe Visa Direct, duke zgjeruar mënyrat se si telefonat inteligjentë mund të përdoren për pranimin dhe dërgimin e pagesave digjitale. Zgjidhjet e reja synojnë t’u ofrojnë bizneseve të vogla dhe mikro-tregtarëve një mënyrë më të thjeshtë dhe më të shpejtë për të menaxhuar pagesat, pa pasur nevojë për pajisje shtesë.
Sipas kompanisë, Visa Accept u mundëson shitësve të përdorin telefonin e tyre inteligjent si terminal pagese, duke pranuar pagesa pa kontakt (tap-to-pay) ose përmes lidhjeve të pagesës. Fondet mund të transferohen në llogaritë e tyre pothuajse në kohë reale, ndërsa konsumatorët vazhdojnë të përfitojnë nga standardet e sigurisë dhe mbrojtjes që ofron rrjeti i Visa-s.
Ndërkohë, Visa Direct zgjeron mundësitë për bizneset që të kryejnë pagesa të shpejta drejt punonjësve, kontraktorëve, furnitorëve apo klientëve për rimbursime, duke përdorur vetëm telefonin inteligjent. Platforma mbështet transferta drejt kartelave bankare, llogarive bankare dhe kuletave digjitale në shumë vende të botës.
Visa thekson se bizneset e vogla kanë nevojë gjithnjë e më shumë për zgjidhje të thjeshta dhe fleksibile, pasi përdorimi i mjeteve financiare digjitale po rritet në nivel global. Sipas të dhënave të kompanisë, shumica dërrmuese e ndërmarrjeve të vogla tashmë përdorin të paktën një mjet financiar digjital për operacionet e tyre të përditshme.
“Çdo pagesë është një moment kyç në marrëdhënien mes biznesit dhe klientit. Ne besojmë se telefoni inteligjent mund të shërbejë si një qendër e vetme për pranimin e pagesave, menaxhimin e transaksioneve dhe zhvillimin e biznesit,” thuhet në njoftimin e Visa-s.
Me këtë zhvillim, Visa synon të përshpejtojë dixhitalizimin e pagesave, veçanërisht në tregjet në zhvillim, duke u ofruar miliona bizneseve të vogla akses në shërbime moderne financiare pa investime të kushtueshme në infrastrukturë. Kompania pret që këto zgjidhje të arrijnë tek miliona tregtarë në mbarë botën gjatë viteve të ardhshme
